DNA有幾重要？DNA可以做啲咩？

[冷知識]

DNA有幾重要？

DNA可以做啲咩？

DNA係所有人最重要資產黎，每個人嘅DNA係獨一無二

首先，透過分析DNA嘅基因排序，可以知道DNA主人嘅性別、種族、某些明顯特徵例如瞳孔嘅顏色，另外都可以分析佢有咩遺傳病、對咩敏感等。

另外，對比兩個人嘅DNA，就可以分析到兩個人係咪有親屬關係。如果DNA嘅保存狀態良好，例如係負80度嘅環境下儲存，理論上可以保存一段好長時間。

而且，DNA可以被複製，係1996年成功創造世界上第一隻複製羊「多莉」，而佢嘅DNA係同原羊完全一樣，之後更有複製豬，複製牛等等，如果用係人類身上真係不敢想像。

小編再同大家講個故事

美國加州惡名昭彰嘅金州殺手迪安杰洛，逍遙法外40多年後，最終透過DNA拉到佢。

佢係1975至1986年間，犯下多宗爆竊、強姦同謀殺案，受害人多達87人，遍布11個縣。

金州殺手犯案期間冇留低指紋，留低嘅DNA，要等技術係90年代成熟後先有用，問題係執法機關嘅DNA資料庫，需要被檢測嘅DNA同資料庫紀錄百分百脗合先有結果，而金州殺手嘅DNA並無脗合嘅紀錄。

之後十幾年，DNA技術迅速發展，一般人可以透過私人企業服務，獲得自己嘅基因數據。有業餘系譜學愛好者更係網上開設平台，比數以百萬人上載自己嘅基因數據，同平台資料庫對比，搵出同自己家族有關聯嘅人，哪怕只係同自己基因數據得少少脗合嘅遠房親戚。

一個調查人員突然發覺，試下係有關平台開一個假帳戶，然後輸入金州殺手DNA數據，結果超過一百個關於金州殺手遠房親戚嘅結果出現。

之後警方同系譜學專家配合，追溯到其中一個人，同金州殺手出自同一位1840年出世嘅太太太爺。佢地之後重組有關家族族譜，涉及數以千人，警方利用年齡、地理位置等其他資料，排除無關人士，最終鎖定前警員迪安杰洛，比對DNA後偵破懸案。

不過呢種做法引黎好多人嘅批評，並表示呢個係唔道德嘅手法，而且好多人關注DNA嘅私隱。

根據《紐約時報》，中國正試圖係新疆用DNA樣本黎創建人臉圖像，並引述專家指，由長遠黎睇，中國政府甚至有可能將DNA樣本產生嘅圖像，輸入正在建設嘅大規模監視同面部識別系統中，通過提高對異見人士同示威者以及罪犯嘅追蹤能力黎加強對社會嘅控制。

可想而知，大家一定要好好保護自己嘅DNA資料，保障自己嘅私隱。

鍾意嘅記得比個like同share👍🏼

同埋唔好漏左like我地個FB page同埋follow我地IG呀

【Trivia 三叉路網站｜https://cutt.ly/Triviahk】

Recent Posts